Am 16. Februar stürmten wir zum ersten Mal die Ratsfabrik, das neue Rathaus in der Lindenstraße. Mit einer Rede und toll organisierten Spielen durch die Verwaltung konnten wir die Macht bis Aschermittwoch übernehmen.
Hier die Rede in voller Länge und einige Bilder vom Rathaussturm.
Servus, Grüß Gott und Hallo!
Da semmer wieder! Endlich! Send mir froh!
Lang ischs her, dass mr so zsamma gewäa isch.
Jetzt endlich, ghots wieder ohne Wisch.
Drei Johr hemmr gwartet auf onsern Narrastall.
Aber heit duats endlich dr große Knall.
Hexa, Käsperle, Oichele und Breiabender
Machet wieder Spaß mit Alte und mit Kender.
Im alta Rathaus war dr Schuldes sehr kreativ:
Als Taucher, Zwerg, Müllsack, Bauarbeiter er lief,
verkleidet als Bersteiger, Goischd und Bob Marley
deshalb erwartet mir nächstes Jahr a Harley.
Ob dr Schultes au hier oba sei Arbeit ordentlich duat
Des schau mr jetzt ond hoffat s isch guat.
Doch vorher wellat wir wissa genau,
wie hoißt des? HEX – kratz me au
Und woisch, was i no wissa will?
Genau: KÄSPERLE – sei still
Do sind aber nomml zwoi Maska dabei
Deshalb lass mr mol kurz die Reimerei:
BREI – abender OICHELE – karsch aos
So, jetzt ischs klar, ihr lieaba Leit.
Wir Narra regieret ab heit.
S erschde Mol wir älle hier in dr Ratsfabrik
I fend, die isch richtig schick.
S hot a bissle länger dauert mit der Einweiherei
Aber jetzt isch se schee ond kaum sieht mr no a Sauerei.
Se isch schee groß ond hot viel Platz,
der muss gfüllt werda ond zwar ratz fatz.
Immer meh Mitarbeiter und innen isch die Reaktion
Drom geit‘s a große Plakat Aktion.
Ed ganz so groß wie „The LÄND“
Aber gelb send se au bis „to the end“
„Du fehlsch aos“ – „Du komsch grad g´schickt“
Stoht do, wenn mr druff blickt.
„Uf di hemmer gwarded“ – „… und jetzt du ao no“
Solche Sprüch sollat dia Plätze fülla — oh oh.
Obs wirklich klappt, stoht heit no ed feschd.
Des isch jetzt halt ammol an Teschd.
Testa sod mr beim nägschda Thema ed.
Sonsch langts ed amol meh a Feldbett.
S Feuerwehrhaus isch alt und baufällig.
Des muaß griecht werda, des koscht einige Pfennig.
Neie Funkmeldeempfänger und a Auto, des isch deier,
do braucht’s no die oi oder andere Feier.
Au die Jugend isch sehr wichtig
deshalb ischs Baua für die genau richtig.
Die bekommat endlich ihr neues Haus
Damit se kommat vo dohoim raus.
Baua will dr Schuldes au im Ort.
Die Grünflächa solled fort.
Tiny Häuser und a kostspielige Innenraumentwicklung
Sollen attraktiv sein für alt und jung.
Ob des so klappt, wie der des will?
Des beobachta mir amol ganz still.
Strom und Wasser isch in Gomrenga so a Sach.
Vom oina zviel, vom andre zwenig, dass i ned lach.
Wasserrohra brechad, Stroßa werdad zu Bäche.
Des musst i oifach gschwend amol asprecha.
S Regaüberlaufbecka braucht wohl zu viel Strom.
Fotovoltaik auf onsre Schuppa, des wär a Option.
Zom Glick gibt’s für da Notfall jetzt genug Ampere.
Im Rathaus, im Bauhof ond bei der Feuerwehr.
Im Ernstfall sind die Stromerzeuger dann hoffentlich fit,
ond ed leer, kaputt oder weg, des wäre, sorry, shit.
Jetzt mach mr kurz a Stimmungsprobe, ned mit Helau,
sondern: Hex – kratz me au!
Und jetzt bitte ed ganz so schrill:
Käsperle – sei still.
Bald henners gschafft,
aber zwoi Sacha send no abracht.
Denn, wenns jetzt nomml schneit, ihr liebe Leit.
Dann misset ihr nemme räuma so weit.
Bei ra Stroß ohne Trottwar
Bloß no 1,2 Meter, ischs klar?
So, ond jetzt no zu dem Gemeindebote.
Der mit de Überschrifta, de Rote.
Aber der hoißt doch jetzt Amtsblatt.
Isch außa ond inna bunt, des find i glatt.
Ja, des gfällt mir au ond s isch besonders nett,
den gibt’s in der App ond au im Internet.
Jetzt hemmer aber no a Frog, denn wir machet ons a bissle Sorga
Schuldes, wo isch denn die Mülltonne mit denne Kronkorka?
Hosch die abgeba ond Geld bekomma?
Wenn ja, was hosch kauft? Wir hen no nix vernomma!
Falls de no brauchsch a Idee.
Wärmflascha für deine Mitarbeiter wäret schee.
Wir hen euch a paar warme Klamotta noglegt,
dass euch die Kälte ohne Heizung ed vom schaffa abhält.
A andre Idee für des Geld vom letschde Johr
wär a Sirene für Notfälle, dass es au hört jedes Ohr.
Es gäb bestimmt no einiges zum verzähla,
doch wellat wir niemanda heit quäla.
Deshalb ischs jetzt rum mit unsrer Rederei.
Wir hoffat, se hat euch gefalla, onsre Reimerei.
Ond nochmal ganz kräftig am Schluss, ich rufa muss und will:
Käsperle – sei still. Hex – kratz me au
Brei – abender Oichele – karsch aos.
